讀冊會ê點點滴滴

林憶秋/慈林宜蘭讀書會

    1995年參加慈林合唱團ê時陣，就知樣有慈林讀冊會，雖然有動過要參加ê想法，但一直攏無實現。一直到行過南湖大山、行過婚姻、行過情感ê起起落落了後，就親像「千帆過盡」搭靠岸ê港口，tī 2005年尾來讀冊會試讀。

    第一本是看「二十世紀台灣代表性人物」，內底講到勁濟以早讀冊攏無讀到ê人物，是實實在在、認真打拼在台灣付出他們ê熱情和活力，互咱感受到他們ê光和熱，就像佛陀講ê～活在當下。「追風箏的人」是一個移居美國ê阿富汗人，寫伊ê一生都tī找機會彌補伊內心ê驚駭（潛藏人性ê惡）及無奈（意志ê薄弱）。「我的人生我作主」中，印象尚深ê就是六尺巷ê故事，真正是退一步海闊天空。

    今年三月有紅衫軍tī台北造成人心不安ê情形，所以我們班長淑玲推薦ê冊中有一本叫「紅色的外套」，有同學就認為無適當，當時我看冊名ê時，嘛有感覺怪怪，班長就將冊名ê故事講給我們聽。原來是一個日本囝仔細漢厝內家境bó好，阿母要伊撿阿姊穿過的紅色學校外套，然後有一寡感人ê代誌發生，這本冊是收錄一個教冊ê爸爸寫給大女兒ê批信，差點就錯過了一本精彩ê冊。林博士講伊看ê冊若放置桌頂，他孫子mā-ē拿去看，實在勁欣羨。

    有一次換吳銘浚主持，伊就將杯阿、茶包、放在每個人ê桌頂，又一個接一個服務倒燒水。讀到赫塞ê冊時，內底有講到法國人喝紅酒配法國麵包，吳銘浚就帶了兩瓶紅酒，素秋帶他店內做ê法國麵包，讓大家來感覺一下，有夠幸福。

    會中有人去遊玩，亦者是發現好食ê物件，攏會帶來會中分享；若有好所在mā-ē招招a，挑一天大家有時間ê日子，同儕出去行行。年初找一個朋友來觀摩，以早伊在學校未曉讀冊，會來參加讀冊會實在真稀奇，其實勁濟代誌會隨著時間而改變。雖然他以早對老師真感冒，但咱內底ê老師攏勁歡迎伊來參加，即嘛伊已經是咱ê一份子。

    舊年七月搬去新竹住，但每個月ê第一個禮拜二攏會準時返來宜蘭報到，你知樣是安怎mā？因為在這個會中ē想咩講出心內的想法、ē凍聽到別人的看法，三角分享生命中的經驗，實在是一件勁美好的代誌。慈林～有你勁好。